ქართველი მოსწავლეების წარმატებული მონაწილეობა სლოვაკეთში გამართული ეკონომიკური ოლიმპიადის საერთაშორისო რაუნდში

2023 წლის 6 სექტემბერს სლოვაკეთში საქართველოს საელჩოს უფროსი მრჩეველი არჩილ სოხაძე ბრატისლავას ეკონომიკურ უნივერსიტეტში დაესწრო, სლოვაკეთში 5-6 სექტემბერს ეკონომიკური ოლიმპიადის საერთაშორისო რაუნდში მონაწილე, დამამთავრებელი კლასების 5 ქართველი მოსწავლის სერტიფიკატების გადაცემის და დაჯილდოების ცერემონიას. ქართველ მოსწავლეებს - ანი გვარამაძეს, ნიკოლოზ ყორანაშვილს, კლიმენტი ბერულავას, ნიკა ვანაძეს და გუკა ცაგარეიშვილს საზეიმო ვითარებაში საელჩოს უფროსმა მრჩეველმა გადასცა ეკონომიკურ ოლიმპიადაში წარმატებით მონაწილეობის სერტიფიკატები და უსურვა მათ სამომავლო წარმატებები.

ეკონომიკურ ოლიმპიადაში ქართველ მოსწავლეებთან ერთად ასევე მონაწილეობდნენ სხვადასხვა ქვეყნის მოსწავლეები. დაჯილდოების ცერემონიაზე მონაწილეებს სიტყვით მიმართა სლოვაკეთის ყოფილმა ფინანსთა მინისტრმა ივან მიკლოშმა. საერთაშორისო ეკონომიკური ოლიმპიადა გაიმართა ბრატისლავას ეკონომიკური უნივერსიტეტის, ბრატისლავას კომენიუსის უნივერსიტეტის, ეკონომიკური და სოციალური ანალიზის ინსტიტუტის (INESS), ჩეხეთის ეკონომიკური განათლების ინსტიტუტის (INEV) და პრაღაში არსებული ნიუ იორკის უნივერსიტეტის ეგიდით და ხელშეწყობით.