სლოვაკეთში საქართველოს ელჩმა რევაზ ბეშიძემ საპატიო სტუმრის სტატუსით მონაწილეობა მიიღო ბრატისლავას რაჩის რაიონის რთველის ფესტივალის „Račianske Vinobranie 2023“ გახსნის ოფიციალურ ცერემონიაში
2023 წლის 15 სექტემბერს სლოვაკეთში საქართველოს ელჩმა რევაზ ბეშიძემ მეუღლესთან ერთად, ბრატისლავას რაჩის რაიონის მერიის მიწვევით, საპატიო სტუმრის სტატუსით მონაწილეობა მიიღო რაჩის რაიონის მერიის მიერ რაჩაში ორგანიზებულ რთველის ფესტივალის „Račianske Vinobranie 2023“ გახსნის ოფიციალურ ცერემონიაში. ღონისძიებას ასევე ესწრებოდნენ საელჩოს თანამშრომლები.
ქართველი მოსწავლეების წარმატებული მონაწილეობა სლოვაკეთში გამართული ეკონომიკური ოლიმპიადის საერთაშორისო რაუნდში
2023 წლის 6 სექტემბერს სლოვაკეთში საქართველოს საელჩოს უფროსი მრჩეველი არჩილ სოხაძე ბრატისლავას ეკონომიკურ უნივერსიტეტში დაესწრო, სლოვაკეთში 5-6 სექტემბერს ეკონომიკური ოლიმპიადის საერთაშორისო რაუნდში მონაწილე, დამამთავრებელი კლასების 5 ქართველი მოსწავლის სერტიფიკატების გადაცემის და დაჯილდოების ცერემონიას. ქართველ მოსწავლეებს - ანი გვარამაძეს, ნიკოლოზ ყორანაშვილს, კლიმენტი ბერულავას, ნიკა ვანაძეს და გუკა ცაგარეიშვილს საზეიმო ვითარებაში საელჩოს უფროსმა მრჩეველმა გადასცა ეკონომიკურ ოლიმპიადაში წარმატებით მონაწილეობის სერტიფიკატები და უსურვა მათ სამომავლო წარმატებები.
ბანსკა ბისტრიცაში გამართული სლოვაკეთის ეროვნული აჯანყების 79-ე წლისთავისადმი მიძღვნილ ღონისძიებები
2023 წლის 28-29 აგვისტოს, სლოვაკეთში საქართველოს საელჩოს უფროსი მრჩეველი, საქმეთა დროებითი რწმუნებული არჩილ სოხაძე იმყოფებოდა სლოვაკეთის ქალაქ ბანსკა ბისტრიცაში, სადაც დაესწრო სლოვაკეთის ეროვნული აჯანყების 79-ე წლისთავისადმი მიძღვნილ ღონისძიებებს და გვირგვინით შეამკო ბანსკა ბისტრიცაში არსებული ეროვნული აჯანყების მსხვერპლთა მემორიალი.
სლოვაკეთის ეროვნული აჯანყების 79-ე წლისთავისადმი მიძღვნილი ოფიციალური ცერემონია
2023 წლის 24 აგვისტოს სლოვაკეთში საქართველოს საელჩოს უფროსმა მრჩეველმა, საქმეთა დროებითმა რწმუნებულმა არჩილ სოხაძემ მონაწილეობა მიიღო ბრატისლავაში სლოვაკეთის ეროვნული აჯანყების 79-ე წლისთავისადმი მიძღვნილ ოფიციალურ ცერემონიაში და გვირგვინით შეამკო ეროვნული აჯანყების მსხვერპლთა მემორიალი.
სლოვაკეთის სოფლის მეურნეობის და საკვები პროდუქტების ყოველწლიური საერთაშორისო გამოფენა „AGROKOMPLEX 2023“ და "დიპლომატიური დღე"
2023 წლის 18 აგვისტოს, სლოვაკეთში საქართველოს საელჩოს უფროსი მრჩეველი არჩილ სოხაძე დაესწრო სლოვაკეთის ქალაქ ნიტრაში გამართულ სოფლის მეურნეობის და საკვები პროდუქტების ყოველწლიურ საერთაშორისო გამოფენას „AGROKOMPLEX 2023“, რომლის ფარგლებში, სლოვაკეთში აკრედიტებული დიპლომატიური კორპუსის წარმომადგენლებთან ერთად მონაწილეობა მიიღო სლოვაკეთის სოფლის მეურნეობის და სოფლის განვითარების სამინისტროს ორგანიზებით გამართულ ღონისძიებაში „დიპლომატიური დღე“.
საქართველოს დროშა დაშვებულია რუსეთ-საქართველოს ომის მე-15 წლისთავთან დაკავშირებით
2008 წლის აგვისტოს რუსეთ-საქართველოს ომის მე-15 წლისთავთან დაკავშირებით და რუსეთის ფედერაციის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივის მიგების ნიშნად, დღეს, 2023 წლის 8 აგვისტოს, სლოვაკეთის რესპუბლიკაში საქართველოს საელჩოს შენობაზე დაშვებულია საქართველოს სახელმწიფო დროშა.
3 აგვისტოს კურორტ შოვში მომხდარი სტიქიური უბედურების შედეგად დაღუპულთა ხსოვნის პატივსაცემად, 7 აგვისტოს გლოვის დღე საქართველოში
2023 წლის 3 აგვისტოს საქართველოს რაჭის რეგიონის კურორტ შოვში მომხდარი სტიქიური უბედურების შედეგად დაღუპულთა ხსოვნის პატივსაცემად, 2023 წლის 7 აგვისტოს საქართველოში გამოცხადდა გლოვის დღე. სლოვაკეთის რესპუბლიკაში საქართველოს საელჩოს შენობაზე დაშვებულია საქართველოს სახელმწიფო დროშა.
სლოვაკეთში საქართველოს ელჩის შეხვედრა სლოვაკეთის პრეზიდენტის მრჩეველთან საგარეო პოლიტიკის საკითხებში
2023 წლის 13 ივლისს სლოვაკეთში საქართველოს ელჩმა რევაზ ბეშიძემ შეხვედრა გამართა სლოვაკეთის პრეზიდენტის მრჩეველთან საგარეო პოლიტიკის საკითხებში იანა კობზოვასთან.
სლოვაკეთში საქართველოს ელჩის შეხვედრა სლოვაკეთის საგარეო და ევროპულ საქმეთა სამინისტროს ეკონომიკის და განვითარების თანამშრომლობის დირექტორატის გენერალურ დირექტორთან
2023 წლის 3 ივლისს სლოვაკეთში საქართველოს ელჩმა რევაზ ბეშიძემ შეხვედრა გამართა სლოვაკეთის საგარეო და ევროპულ საქმეთა სამინისტროს ეკონომიკის და განვითარების თანამშრომლობის დირექტორატის გენერალურ დირექტორთან ლუცია კიშშთან.
სლოვაკეთში საქართველოს საელჩომ მონაწილეობა მიიღო სლოვაკეთის საგარეო და ევროპულ საქმეთა სამინისტროს მიერ ორგანიზებულ ღონისძიებაში „Open Day“
2023 წლის 17 ივნისს, სლოვაკეთში საქართველოს საელჩომ მონაწილეობა მიიღო სლოვაკეთის საგარეო და ევროპულ საქმეთა სამინისტროს ცერემონიათა დარბაზში გამართულ ღონისძიებაში „Open Day“, სადაც საქართველოს საელჩოსთვის გამოყოფილ ცალკე მაგიდაზე გამოფენილ იქნა ბუკლეტები საქართველოს შესახებ, ქართული ნაციონალური სხვადასხვა სახის სუვენირები, საელჩოს ინიციატივით სლოვაკურ ენაზე ხელახლა გამოცემული შოთა რუსთაველის „ვეფხისტყაოსანი“, ასევე სლოვაკურ ენაზე გამოცემული წიგნები ქართული კულინარიის შესახებ და ქართული სასაჩუქრე ღვინო. საელჩოს მაგიდა გაფორმდა საქართველოს სახელმწიფო დროშით და ქართული ეროვნული სუფრის გადასაფარებლით.
ღონისძიებას დაესწრო სლოვაკეთში საქართველოს ელჩი რევაზ ბეშიძე მეუღლესთან ერთად და საელჩოს ყველა თანამშრომელი. აღსანიშნავია, რომ საქართველოს საელჩოს მაგიდას ეწვიენ სლოვაკეთის საგარეო და ევროპულ საქმეთა მინისტრი მიროსლავ ვლახოვსკი და სამინისტროს სახელმწიფო მდივანი ინგრიდ ბროცკოვა. ელჩმა მინისტრს და სახელმწიფო მდივანს საჩუქრად გადასცა ქართული ღვინო და სამახსოვრო ქართული სუვენირები.
ღონისძიებაზე მოსული დამთვალიერებლების მხრიდან დიდი ინტერესი გამოიხატა საქართველოს საელჩოს მიერ წარმოდგენილ სუვენირებზე და სხვადასხვა სახის ბუკლეტებზე, რომლებიც უსასყიდლოდ გადაეცათ მათ. ღონისძიებაში მონაწილეობა მიიღო ბრატისლავაში აკრედიტებულმა 30 ქვეყნის საელჩომ.
ბრატისლავაში გაიმართა საქართველოს დამოუკიდებლობის დღისადმი მიძღვნილი მიღება
2023 წლის 14 ივნისს, სლოვაკეთში საქართველოს საელჩომ, ბრატისლავას ღირშესანიშნავი ისტორიული ციხესიმაგრის „Hrad“-ის შიდა ეზოში მდებარე „Hradna“-ს წვეულებათა დარბაზში გამართა საქართველოს დამოუკიდებლობის დღისადმი და საქართველოს და სლოვაკეთის რესპუბლიკას შორის დიპლომატიური ურთიერთობების დამყარების 30 წლის იუბილისადმი მიძღვნილი საზეიმო მიღება.
მიღება გაიხსნა საქართველოს და სლოვაკეთის ეროვნული ჰიმნებით, რომლის შემდეგ მოწვეული სტუმრების წინაშე მისასალმებელი სიტყვით წარსდგა სლოვაკეთის რესპუბლიკაში საქართველოს საგანგებო და სრულუფლებიანი ელჩი რევაზ ბეშიძე.
მიღებაზე დამონტაჟებულ ეკრანზე გამოსახული იყო საქართველოს და სლოვაკეთის სახელმწიფო დროშები და საქართველოს დამოუკიდებლობის დღის და საქართველოს და სლოვაკეთის რესპუბლიკას შორის დიპლომატიური ურთიერთობების დამყარების 30 წლის ლოგოები. მიღებას ფონად გასდევდა ქართული მრავალხმიანი კომპოზიციები.
აღსანიშნავია, რომ საელჩო, მოწვეულ სტუმრებს, ევროპულ კერძებთან ერთად, გაუმასპინძლდა ქართული ტრადიციული კერძებით და ქართული ღვინით.
მიღებაზე მოწვეულ სტუმრებს შორის იყვნენ: სლოვაკეთის ეროვნულის საბჭოს (პარლამენტი) ვიცე-სპიკერები - გაბორ გრენდელი და იურაი ბლანარი, ეროვნული საბჭოს საგარეო საქმეთა კომიტეტის თავმჯდომარე მარიან კერი, სლოვაკეთის საგარეო და ევროპულ საქმეთა სამინისტროს ეკონომიკის და განვითარების თანამშრომლობის დირექტორატის გენერალური დირექტორი ლუცია კიშში, ამავე სამინისტროს დიპლომატიური პროტოკოლის დეპარტამენტის დირექტორი ინგრიდ ჰორვეი, სლოვაკეთში საქართველოს საპატიო კონსული ნოდარ გიორგაძე, ასევე სლოვაკეთის აღმასრულებელი და საკანონმდებლო ხელისუფლების წარმომადგენლები, სლოვაკეთში აკრედიტებული დიპლომატიური მისიების და საერთაშორისო ორგანიზაციების ხელმძღვანელები და საელჩოების წარმომადგენლები, სლოვაკეთის კულტურის, ხელოვნების, მას მედიის და არასამთავრობო ორგანიზაციების წარმომადგენლები და სლოვაკეთში მცხოვრები საქართველოს მოქალაქეები.
